حاجات محتاجة تعرفيها قبل الجواز

حاجات محتاجة تعرفيها قبل الجواز

قبل الجواز بيبقي فيه ضغط كبير و نصايح اكتر, و ناس بتكلمك من خلال خبرتها و فاكرة ان كل الناس شبهها, لكن في الحقيقة ان كل جوازة هي حالة مستقلة بذاتها و ان تشابهت بعض الأشياء, لكن في الاخر حياتك ارسميها مع شريكك من غير ما تسمعي لكل الناس ديه, هنوضحلك دلوقتي كام نقطة لحظنا اشتراكهم في جميع او معظم جوزات الناس اللي حوالينا بمعني أصح.

1. خلي ليكي مصدر دخل:

مهم اوي يبقي ليكي مصدر بيدخلك فلوس حتي لو مش كتير, سواء شغل او مشروع انتي عامله, او حتي وديعة في البنك, المهم يبقي كل فترة بيدخلك فلوس ليكي انتي محدش متحكم فيها, الفلوس ديه تشتري منها حاجات تخصك, تخرجي بيها, تعيشي بها حياتك انتي المنفصلة عن جوزك, و لو لقدر الله حصل مشاكل بينك و بين جوزك قدام و كنتي حابة تنفصلي عنه و ده وارد جدًا, تقدري تعملي ده من غير ما تبقي خايفة من فكرة انا مين هيصرف عليا, خلي دايمًا عندك القدرة المادية انك تشيلي نفسك.

2. الفحص الطبي:

قبل الجواز فيه تحاليل بتتعمل لفحص أمراض الدم الوراثية, و اللي ممكن يتصاب بيها الأطفال في المستقبل, أو الأمراض الكبدية و اللي ممكن تنتقل بين الأزواج, الفحص ده اجباري انه يحصل قبل اي جواز عشان القسيمة تطلع, و لكن معظم الناس بيرشوا الموظفين و يأخدوا ورق الفحص و عليه الامضاء و كأن كل الفحوصات اتعملت, في الحقيقة ده مش بيذيكي انتي لوحدك, لكن ده ممكن يأذي ولادك كمان, فارجوكي اعملي الفحوصات ديه فعلًا و اطلبي من شريكك انه يعملها لانها فعلًا مهمة.

3. خصصي وقت ليكي:

ان يكون عندك وقت ليكي انتي بعيد عن جوزك و ولادك حاجة مهمة جدًا, لان في الوقت اللي بتبعدي فيه حتي لو لكام ساعة بتبدأي تحسي بنفسك تاني بعد ما كنتي في متاهة بين جوزك و عيلتك, فوقتك لنفسك مهم جدًا و هو وقاية ليكي من اهمال الذات اللي ممكن يوقفك قدام نفسك في المراية بعد سنين كتير و تقولي انا ايه اللي أنا عملته في نفسي ده, فالوقت ده خليه دايما زي الفصلة اقفي فكري في نفسك و احلامك انتي.

4. كل واحد له مساحته:

خليكي فاهمة زي ما انتي محتاجة وقت لنفسك بالمثل شريكك, المساحة مش بس وقت, المساحة ممكن تكون بعض الخصوصية في بعض الأشياء, زي مثلا الرجل ممكن يحب يقعد يعمل الاشيء بعد ما يرجع من الشغل, و انتي مثلا عايزة تقعدي تسمعي مزيكا في الشباك بعد يومك من غير ما حد يقطعك, كلها حاجات بتتفقوا عليها بس المهم انكوا تحترموا مساحة بعض.

5. هدنة العلاقة:

زي اي حاجة في الدنيا بنحتاج نريح منها, حتي في الجواز محتاجين نريح, نكسر روتين, سواء تسافري مع صحابك, تباتي عند اهلك, المهم تفصلي وتغيري روتين.

في اوقات تانية بيبقي لابد من هدنة ضرورية, وقت المشكلات الكبيرة, او الخناقات اللي بتفقدوا فيها السيطرة وقتها بيبقي لازم تبعدوا عن بعض عشان اي قرار بتخدوه و انتوا شالين من بعض غالبًا بيبقي غلط.

6. الثقافة الجنسية:

في نقص في الثقافة الجنسية في الوطن العربي بشكل عام و وده بيشكل جزء مش صغير من مشاكل البيوت, ان مفيش وعي بجسمك بشكل خاص و لا الجنس  بشكل عام , فبالتالي مينفعش تخوضي تجربة الجواز و انتي جاهلة بالحياة الجنسية او معتمدة علي معلومات من صُحابك و ممامتك, حاولي تقرائي كتب موثوقة المصادر تديكي ثقافة جنسية, لو حاسة ان الفكرة مخوفاكي اوي ممكن تروحي لأخصائي جنسي يساعدك تفهمي اكتر.