ليه مهم تسافر لوحدك؟

ليه مهم تسافر لوحدك؟

أكيد جتلك لحظة كنت عايز تهرب فيها و تسيب كل حاجة وراك, بس عايز تفصل عن العالم, و الروتين اليومي بتاعك, و حقك طبعًا, البني ادم طاقته يدوبك و اللي بنشوفه كل يوم مش شوية, بس كام مرة حققت الرغبة ديه؟ مرة, اتنين, ولا مرة؟ طب فكرت مرة تكأفي نفسك بسفرية, بس مش مع حد, سفرية لوحدك فيها تمامًا بعيد عن كل اللي يعرفوك؟

لو جربت فخلاص أنت كدة تمام اوي و لو حابب تقرأ بردو عادي اكيد هتطلع بحاجة جديدة, أما لو مجربتش خالص فأنت فايتك تجربة مهمة جدًا و هنقنعك أنك لازم تجربها, خلي نفسك طويل شوية بس و اكتشف معانا.

أهمية السفر لوحدك؟

1.أكتشاف نفسك

فيه حاجة مهمة لازم تفهمها أنك عمرك ما هتفهم الناس او تدرك مشاعرهم غير لما تفهم نفسك و مشاعرك الاول, و بما ان انت بتبقي صديق نفسك في الرحلة, فبتبدا تكتشف نفسك و بالمناسبة ده حتي بيبتدي من قبل ما تبدأ الرحلة, ده بيبدا من أول ما بتقرر أنك هتخوض تجربة السفر لوحدك, فبتبدا تسأل نفسك كل الأسئلة اللي كنت هتسألها لصُحابك اللي كانوا هيطلعوا معاك: هنروح فين؟ طب هنروح ازي؟ طب هنعمل ايه هناك؟ و من هنا هتبدا تكتشف ايه اصلًا الاماكن اللي انت بتفضل السفر ليها بعيدًا عن قرارات صُحابك.

2.تحمل المسئولية

السفر لوحدك هيخليك غصب عنك تشيل مسئولية نفسك, من اول اختيارك هتسافر فين و هتعمل ايه, لحد هتأكل ايه, و تغسل هدومك ازي.

النقطة ديه مهمة اوي للرجالة و الستات, ببساطة لان انت لما بتتحمل مسئولية نفسك من الالف للياء, ده بيخليك قادر تبقي مسئول عن حياتك كلها بالاعتماد علي نفسك دون الاعتماد علي الجنس الاخر بحجة انه بيعرف يعمل ده اكتر مني.

تحمل المسئولية هيخليك تعترف بخطأك و تتعلم حتي ازي تتجنب بعض الاخطاء, ببساطة لانك بتبقي عارف ان مفيش حد تلومه, لان كل القرارات كانت قراراتك و ده بيخليك تفكر بدقة و شكل احسن, ده غير أن تحمل المسئولية بيفرق معك علي المستوي العملي, ايوة بيفرق معاك في شغلك مش بس حياتك الشخصية.

3.اكتساب الثقة بالنفس

بعد كل قرار بتأخده و تنفذه و يبسطك, و كان صح ثقتك في نفسك هتزيد, فتخيل انت محتاج تأخد كام قرار في السفر و اللي معظمهم هيبقوا صح متقلقش, فمتخيل ثقتك في نفسك هتزيد اد ايه؟

غير أنك لما بتسافر لوحدك بتحتاج تتعامل بثقة مع اللي حواليك عشان من الاخر محدش يستغفلك او يضحك عليك, فحتي لو انت من الناس اللي ثقتهم في نفسهم مهزوزة شوية, هتلاقي نفسك بترسم قدام اللي حواليك انك واثق في نفسك و بالمناسبة ده بيخليك بالفعل مع الوقت واثق في نفسك!  ازاي؟ هتعرف لما تجرب.

4.الخروج من منطقتك المريحة

السفر لوحدك بيخليك تخرج من منطقة الراحة بتاعك او ال Comfort zone, لانك ببساطة بتبقي بتعمل حاجات لاول مرة تعملها يعني حاجات مجهولة عندك او مش مالوفة بنسبالك و حتي ان كانت مالوفة فبردو عمرك ما اخترت انك تعملها لوحدك, فلحدما ده بيبقي موتر شوية في الأول, لكن بعد كدة يبقي خلاص و تبدأ تدور علي حاجات جديدة مش متعود تعملها لوحدك عشان تحس بنشوة البدايات تاني, ده غير ان ده بيخليك تعمل حاجات كتير كنت ماجلها عشان بس هتوترك و تخليك تخرج من الComfort zone بتاعتك, لكن بعد ما بتسافر لوحدك بيبقي خلاص أنت عرفت الطريق للخروج من منطقة الأمان و بالمناسبة افتكر ان كل الحاجات الممتعة المجنونة غالبًا بتبقي بره مناطق الراحة بتاعتنا.

مميزات السفر بمفردك:

1. لك مطلق الحرية:

ليك الحرية المطلقة في انك تعمل اللي انت عايزه, من أول هتروح فين, ايه الأنشطة اللي هتعمليها, الأماكن اللي هتزرها, هتقدر تجرب حاجات جديدة, محدش هيمنعك تعمل ده, وقتك بالمعني الحرفي كله ملكك, أنت مش مضطر تستني حد, أو تروح تعمل حاجة مع حد.

2.تكوين اصدقاء و معارف جدد:

السفر لوحدك بيديك الفرصة أنك تتعرف علي ناس جديدة, و ده بالطبيعة انك لوحدك و بما ان الانسان كائن اجتماعي, فاكيد بيحتاج ناس يتكلم معها, وقتها بتقدر تتعرف علي ناس جديدة, ناس شبهك او حتي مختلفين عنك, و بالمناسبة أنت ممكن تقابل ناس يغيرولك حياتك 180 درجة, فيه جزء من الناس اللي بتقابلها بيبقوا مجرد صُحاب رحلة و فيه ناس بيبقوا من أعز صُحابك او بياثروا في حياتك بشكل كبير اوي, و في بقي المعارف اللي بتكونها في الأماكن اللي بتروحها و دول بيساعدوك لما بتروح نفس الأماكن تاني. 

 3. الحصول علي وقت ذي جودة:

السفر لوحدك هيديك كامل الحرية في وقتك زي ما قُلنا, بس مش مجرد وقت كدة و خلاص, ده وقت بجودة عالية يعني ايه؟ يعني هتعرف تستمع بوقتك, و ترتاح ذهنيًا او حتي تركز في قرارات انت كنت مأجلها عشان محتاج تأخدها علي رواقة, أو قرارات مش عايز حد يأثر عليك فيها, فالسفر لوحدك بيديك كامل الحق ده.

 4.حرية الأقامة:

فيه ناس لما بتسافر لوحدها بتبقي حابة تعيش التجربة كاملة, يعني تنزل في بيوت شباب, و ديه بتبقي اسعارها مناسبة جدًا للناس اللي بتسافر لوحدها, كمان بيبقي ممكن تأجر سرير في أوضة و يكون معاك حد تاني, و كمان في اختيار تاني أنك تنزل عند أسرة من      أهل البلد ديه و تستضيفك و تشوف البلد ديه من خلال عيون أهلها و فيه كذا ابليكشن بيوفروا ده و أشهرهم  

  CouchSurfing

ده طبعًا بيبقي اوفرك و بيخليك تعيش تجربة مختلفة و اللي غالبًا بيبقي صعب أنك تعملها لو معاك حد.

- ملوحظة بس صغيرة الفرق بين الاهمية و المميزات, ان الاهمية ديه مش هتفرق معك في الرحلة بس, ديه هتفرق معاك في حياتك بشكل عام, اما المميزات فهتفرق معك في الرحلة بشكل خاص.

عيوب السفر لوحدك:

و زي اي حاجة, فيها المميزات و العيوب, بس أحنا هنساعدك تتغلب علي العيوب ديه

1.تكلفة الاقامة:

 لو قررت تكون اقامتك في الفنادق مش بيوت شباب او استضافة عند حد, فالاقامة غالبًا في الفنادق لوحدك بتبقي مكلفة اكتر لما بتبقي لوحدك, في الحالة ديه بتبقي الأماكن اللي هتوفرك اقامة فندقية لوحدك محدودة شوية لكن مش مستحيلة, كمان ممكن تأجر شقة و مش دايمًا تأجير الشقق او الاستديوهات بيبقي غالي زي ما انت فاكر.

2.الاهتمام بالتفاصيل:

السفر لوحدك بيحتاج منك أنك تكون مركز في أدق التفاصيل, لان ببساطة انت مش معاك حد يلفت نظرك للتفاصيل او الاحتايجات الأساسية, ببساطة انت دليل نفسك الوحيد, و في احتياجات أساسية او ممكن تناسها مع انها مهمة و دي بردو متقلش هنقولك عليها, و بالمناسبة أنسب طريقة تعرف بيها ايه كل احتياجاتك الخاصة اللي بتحتجاها في يومك, أنك تجيب ورقة و قلم و تخيل نفسك و انت لسا بتصحي من النوم و عيش يومك بتفاصيله في خيالك و ابدا اكتب بقي كل حاجة هتلاقي نفسك بتستخدمها.

3.حفظ ادواتك الشخصية:

من أكبر المشاكل اللي بتواجه اللي الشخص اللي مسافر لوحده, هي طب أسيب حاجاتي فين, أسيب حاجاتي لمين؟

لو أنت في فندق فغالبًا بيكون فيه خزنة و بالتالي ممكن تسيب حاجاتك المهمة فيها, اما لو أنت مقيم عند حد أو في بيت شباب مع شخص تاني, فحاول اثبات الشخصية و الكاش يبقوا معاك, غير ان ممكن لو معاك اي اجهزة خايف عليها تحطها في شنطة سفرك الكبيرة و تتأكد طبعًا من أنك عملها رقم سري, أما في حالة الأنشطة اللي بتتطلب أنك تكون غير حامل لأي شيء, ففي الحالة ديه أسال المسئول عن الرحلة او النشاط ممكن تسيب حاجاتك فين وغالبًا بيكون فيه أمانات للناس اللي طالعة لوحدها أو معاها حاجات كبيرة و لو مفيش فالمسئول نفسه بيكون محل ثقة أنك تسبله حاجاتك لأن ده شغله فبالتالي بيبقي خايف علي سمعته.

4.التصوير و توثيق اللحظات:

غالبًا الناس اللي بتحب السفر بشكل عام بتبقي بتحب التصوير و ان كان لكل قاعدة شواذ, بالنسبة أنك توثق السفرية و تصوير كل حاجة بالتفصيل فمتقلقش خالص أنت معاك الوقت و الحرية الكافيين أنك تعمل ده, المشكلة بتيجي لو أنت من الناس اللي بتحب التصوير, بس حتي ديه مبقتش مشلكة مع اكسسوارات الموبيلات اللي بقيت متوفرة في كل الأماكن, ممكن تجيب لنفسك تريبود و الطول اللي أنت تحبه, و تبدأ تستخدمه في تصوير نفسك, غير أن انت هتلاقي ناس مش بتضايق خالص لما تطلب منهم التصوير بالعكس, بيبقوا بيحبوا ده جيدًا و كمان هيصورك صور مجتش افكارها في بالك.

احتياجات:

فيه حبة حاجات لو معاك هتفرق معاك اوي و توفرك وقت و بتبقي مريحة

1.شنطة وسط

 أهمية الشنطة ديه لا تقل أهمية عن الشنطة اللي فيها هدومك و حاجاتك, هي اه شنطة صغيرة بس مهمة جدًا, ديه بقي بيتحط فيها اثيات الشخصية بتاعك, فلوسك, موبايلك, اوراقك, و اي  حاجة ممكن تتطلب منك و بيبقي لازم تطلها بسرعة, لان ببساطة ده هيسهل عليك التدوير و التوتر, و الحيرة, و خلي بالك انك مش معاك حد يساعدك و يمسلك حاجة, انت لازم تعتمد علي نفسك تمام الاعتماد.

 

2.شنطة ضهر

نفس أهمية شنطة السفر صدقتني, لان ديه اللي هتطلع بيها الباص او الطيارة, و اللي هيبقي فيها الحاجات اللي بتستخدمها علي طول زي الشحن, البوربانك, لاب توب لو بتعتمد عليه بشكل مستمر, كاميرا, كتاب, ده غير انك هتبقي بتستخدمها في مشاويرك كلها لما توصل المدينة اللي أنت مسافرلها.

المهم مش اي شنطة ضهر كدة و خلاص تتجاب, لا شنطة يكون ليها جيوب كتير و متقسمة نقسيمة تساعدك تجيك حاجاتك بسرعة و في نفس الوقت تحافظ علي الحاجات اللي جواها و تكون خامتها كويسة عشان تستحمل معاك. الشنطة ديه هتبقي صحابتك, فنقيها كويس جدًا.

3.الشواحن

الشواحن بتاعتك سواء الموبايل, الكاميرا, لاب توب, سماعات,اوحتي اي حاجة غير كدة, عشان متبقاش خدت الجهاز نفسه و زحمت مكان علي الفاضي و في الاخر تنسي الحاجة اللي بتشغله.

4.Tripod

التريبود ده هيساعدك تأخد صور لنفسك, طول ما هو محطوط علي سطح ثابت, كمان في احجام مختلفة تقدر تنقي اللي يناسبك.

5.سماعات

السماعات ديه من الحاجات المهمة الذي لا غني عنها في رحلتك, هتغنيك في أوقات كتير عن انك تسمع دوشة و دربكة و ده 

بيحصل كتير في السفر, غير كمان انها بتبقي علامة واضحة انك مش عايز تتكلم دلوقتي أو تتعرف علي حد و محتاج تستجم.

6.أدوات نظافتك الشخصية

فرشة الاسنان, الحاجات اللي بتستخدمها أثناء الاستحمام, الكريمات, و لو انت شخص بشرته حساسة و رايح بيئة حر, لازم تأخد بالك من ده و تشوف ايه الحاجات المناسبة ليك من قبل ما تسافر وتسأل دكتور يساعدك او حاجات تبقي مجربها قبل كدة بالفعل.  

7.شنطة طوارىء

تأخد بس حاجات بسيطة عشان متتسوحش, ادوية برد و ده وارد جدًا لما بتتحرك من بيئة لبيئة مختلفة, حاجة للمعدة عشان لو عكيت في الأكل, أو جربت حاجة جديدة و معدتك مثلًا مستحملتهاش, دوا قولون لو زي 3\4 الشعب المصري من مرضي القولون, و اي ادوية تانية ممكن تحتاجها خدها معاك.

8.الفلوس

خالي معاك فيزا و كاش, استخدم الفيزا في الأماكن اللي فيها الاختيار ده, و حافظ علي الكاش علي قد ما تقدر, و خلي دايمًا في حل ان فيه حد في بلدك ممكن يحولك فلوس في أسوء الظروف.

و اخيرا اثر السفر علي صحتك: طبقًا لدراسات مختلفة فالسفر:

1.يزيد من ليقاتك البدنية

2.بيقللك توترك

3.بيقلل من فرص الاصابة بأمراض القلب

4.بيحسن صحة دماغك

5.تعزيز المرونة العقلية

ها قررت هتسافر فين بقي؟